Breaking
Mon. Jun 17th, 2024

ನಾಯ್ಡು, ಪವನ್ ಕಲ್ಯಾಣ್ ಜಾತ್ಯಾತೀತರು, ಆದರೆ.. ಅವರ ಹೊಸ ಸ್ನೇಹಿತ ಅಂಥವರಲ್ಲ – ಪ್ರಕಾಶ್ ರೈ ಹೀಗಂದಿದ್ದು ಯಾರಿಗೆ?

By Mooka Nayaka News Jun 7, 2024
Spread the love

ಹೈದರಾಬಾದ್: ಆಂಧ್ರಪ್ರದೇಶದ ನೂತನ ಮುಖ್ಯಮಂತ್ರಿಯಾಗಿ ಸದ್ಯದಲ್ಲೇ ಪ್ರಮಾಣ ವಚನ ಸ್ವೀಕರಿಸಲಿರುವ ಚಂದ್ರಬಾಬು ನಾಯ್ಡು ಹಾಗೂ ನಾಯ್ಡು ಅವರ ಟಿಡಿಪಿ ಪಕ್ಷದೊಂದಿಗೆ ಮೈತ್ರಿ ಹೊಂದಿರುವ ಜನಸೇನಾ ಪಕ್ಷದ ಸಂಸ್ಥಾಪಕ ಪವನ್ ಕಲ್ಯಾಣ್ ಅವರಿಗೆ ನಟ ಹಾಗೂ ನಿರ್ದೇಶಕ ಪ್ರಕಾಶ್ ರೈ ಅಭಿನಂದನೆ ಸಲ್ಲಿಸಿದ್ದಾರೆ.

ತಮ್ಮ ಅಭಿನಂದನೆಗಳನ್ನು ಟ್ವಿಟರ್ ಮೂಲಕ ಸಲ್ಲಿಸಿರುವ ಅವರು, “ಆತ್ಮೀಯ ಚಂದ್ರಬಾಬು ನಾಯ್ಡು ಹಾಗೂ ಪವನ್ ಕಲ್ಯಾಣ್ ಅವರೇ, ಇತ್ತೀಚಿನ ಚುನಾವಣೆಗಳಲ್ಲಿ ನೀವು ಗಳಿಸಿರುವ ಜಯಕ್ಕಾಗಿ ನಾನು ನಿಮ್ಮನ್ನು ಅಭಿನಂದಿಸುತ್ತೇನೆ. ನಾನು ಈಗಾಗಲೇ ಹಲವಾರು ವರ್ಷಗಳಿಂದ ನಿಮ್ಮ ಜೊತೆಗೆ ಒಡನಾಟ ಹೊಂದಿದ್ದೇನೆ. ಅದರ ಆಧಾರದಲ್ಲಿ ಹೇಳುವುದಾದರೆ, ನೀವಿಬ್ಬರೂ ಜಾತ್ಯಾತೀತ ಮನೋಭಾವದವರು. ಆದರೆ, ನೀವೀಗ ಕೈ ಜೋಡಿಸಿರುವ ನರೇಂದ್ರ ಮೋದಿಯವರು ಹಾಗಲ್ಲ ಎಂದು ಹೇಳಿದ್ದಾರೆ.

“ಒಂದು ಅದ್ಭುತವಾದ ಜನಾದೇಶದೊಂದಿಗೆ ಇಂದು ರಾಷ್ಟ್ರಮಟ್ಟದ ರಾಜಕೀಯದಲ್ಲಿ ನಿಮ್ಮ ಪಾತ್ರ ಅತಿ ದೊಡ್ಡದಾಗಿ ಕಾಣುತ್ತಿದೆ. ಈ ಹೊತ್ತಿನಲ್ಲಿ, ಆಂಧ್ರಪ್ರದೇಶಕ್ಕೆ ಕೇಂದ್ರದಿಂದ ಸಿಗಬೇಕಾದ ನ್ಯಾಯಯುತವಾದ ಸವಲತ್ತುಗಳನ್ನು, ಯೋಜನೆಗಳನ್ನು ಸಿಗುವಂತೆ ಮಾಡುವಲ್ಲಿ ನೀವು ತದೇಕಚಿತ್ತರಾಗಿ ಕೆಲಸ ಮಾಡುವಿರಿ ಎಂಬ ವಿಶ್ವಾಸ ನನಗಿದೆ’’ ಎಂದು ಅವರು ಹೇಳಿದ್ದಾರೆ.

ಅದರ ನಡುವೆಯೇ, “ನೀವು ಕೋಮುವಾದ ಹಾಗೂ ರಾಜಕೀಯ ಧ್ರುವೀಕರಣದಂಥ ಪೀಡೆಗಳ ವಿರುದ್ಧವೂ ನಿರ್ದಾಕ್ಷಿಣ್ಯವಾಗಿ ಹೋರಾಡುತ್ತೀರಿ ಎಂಬ ಭರವಸೆಯೂ ನನಗಿದೆ. ನಿಮ್ಮನ್ನು ನಾನು ತುಂಬಾ ವರ್ಷಗಳಿಂದ ಬಲ್ಲವನಾದ್ದರಿಂದ, ನೀವು ನನ್ನನ್ನು ಎಂದಿಗೂ ನಿರಾಸೆ ಮಾಡುವುದಿಲ್ಲ ಎಂದು ನಿರೀಕ್ಷೆಯನ್ನಿಟ್ಟುಕೊಂಡಿದ್ದೇನೆ’’ ಎಂದು ಅವರು ತಿಳಿಸಿದ್ದಾರೆ. ಅವರ ಈ ಟ್ವೀಟ್ ವೈರಲ್ ಆಗಿದೆ.

Related Post