Breaking
Tue. Jul 16th, 2024

ಶಿವಮೊಗ್ಗ ಡಿಸಿಸಿ ಬ್ಯಾಂಕ್‌ ಚುನಾವಣೆ: ಮಂಜುನಾಥ ಗೌಡ ಬಣ ಜಯಭೇರಿ, ಬಿಜೆಪಿಯ ಸಹಕಾರ ಭಾರತಿಗೆ ಹೀನಾಯ ಸೋಲು

By Mooka Nayaka News Jun 28, 2024
Spread the love

ಶಿವಮೊಗ್ಗ: ಸಹಕಾರ ಕ್ಷೇತ್ರದ ಪ್ರತಿಷ್ಠಿತ ಶಿವಮೊಗ್ಗ ಜಿಲ್ಲಾ ಕೇಂದ್ರ ಸಹಕಾರಿ (ಡಿಸಿಸಿ) ಬ್ಯಾಂಕ್‌ ಆಡಳಿತ ಮಂಡಳಿಗೆ ನಡೆದ ಚುನಾವಣೆಯಲ್ಲಿ ಹಾಲಿ ಅಧ್ಯಕ್ಷ ಆರ್‌ಎಂ ಮಂಜುನಾಥಗೌಡ ಬಣ ಜಯಭೇರಿ ಭಾರಿಸಿದೆ. ಬಿಜೆಪಿಯ ಸಹಕಾರ ಭಾರತಿ ದಯನೀಯ ಸೋಲು ಅನುಭವಿಸಿದೆ.

ಆಡಳಿತ ಮಂಡಳಿಯ 12 ಸ್ಥಾನಗಳಿಗೆ ಶುಕ್ರವಾರ ನಡೆದ ಚುನಾವಣೆಯಲ್ಲಿ ಕಾಂಗ್ರೆಸ್‌ನ 11 ಬೆಂಬಲಿಗರು ಜಯಗಳಿಸಿದರೆ, ಬಿಜೆಪಿಯ ಒಬ್ಬರು ಜಯಗಳಿಸಿದ್ದಾರೆ. ಕಾಂಗ್ರೆಸ್‌-ಬಿಜೆಪಿ ಬೆಂಬಲಿಗರ ನಡುವಿನ ಪೈಪೋಟಿಯಲ್ಲಿ ರಾಷ್ಟ್ರ ಭಕ್ತರ ಬಳಗದಿಂದ ಸ್ಪರ್ಧಿಸಿದ ಏಕೈಕ ಸ್ಪರ್ಧಿ ಮಹಾಲಿಂಗಯ್ಯಶಾಸ್ತ್ರಿ ಜಯಗಳಿಸುವ ಮೂಲಕ ಬಳಗಕ್ಕೆ ಮೊದಲ ಜಯ ತಂದುಕೊಟ್ಟಿದ್ದಾರೆ. ಒಟ್ಟಾರೆ 13 ಸ್ಥಾನಗಳ ಪೈಕಿ ಹೊಸನಗರ ಪ್ಯಾಕ್ಸ್‌ನಿಂದ ಎಂಎಂ ಪರಮೇಶ್‌ ಅವಿರೋಧ ಆಯ್ಕೆಯಾಗಿದ್ದರು.

ಹಾಲಿ ನಿರ್ದೇಶಕರಲ್ಲಿ ಅಧ್ಯಕ್ಷ ಆರ್‌ಎಂ ಮಂಜುನಾಥಗೌಡ, ಹಿರಿಯ ಸಹಕಾರಿ ಬಸವಾನಿ ವಿಜಯದೇವ್‌, ಜಿಎನ್‌ ಸುಧೀರ್‌ ಜಯಗಳಿಸಿದರೆ, ಉಪಾಧ್ಯಕ್ಷ ಎಚ್‌ಎಲ್‌ ಷಡಾಕ್ಷರಿ, ನಿರ್ದೇಶಕರಾದ ಅಗಡಿ ಅಶೋಕ್‌, ಜೆಪಿ ಯೋಗೇಶ್‌, ಎಸ್‌ಪಿ ದಿನೇಶ್‌, ಬಿಡಿ ಭೂಕಾಂತ್‌ ಸೋಲು ಅನುಭವಿಸಿದ್ದಾರೆ.

ಶಾಸಕ ಗೋಪಾಲಕೃಷ್ಣ ಬೇಳೂರು ಕೇವಲ ಒಂದು ಮತದ ಜಯಗಳಿಸಿ ಮೊದಲ ಬಾರಿಗೆ ಡಿಸಿಸಿ ಬ್ಯಾಂಕ್‌ ಆಡಳಿತ ಮಂಡಳಿ ಪ್ರವೇಶ ಮಾಡಿದ್ದಾರೆ. ಶಿಮುಲ್‌ ಹಾಲಿ ನಿರ್ದೇಶಕರಲ್ಲಿ ಶಿವಶಂಕರಪ್ಪ, ಕೆಪಿ ರುದ್ರಗೌಡ ಜಯಗಳಿಸಿದರೆ, ಡಿ ಆನಂದ್‌, ಎಚ್‌ಬಿ ದಿನೇಶ್‌ ಬುಳ್ಳಾಪುರ, ಎನ್‌ಡಿ ಹರೀಶ್‌, ಮಾಜಿ ಅಧ್ಯಕ್ಷ ಜಗದೀಶ್ವರ್‌ ಸೋಲು ಅನುಭವಿಸಿದ್ದಾರೆ.

ಶುಕ್ರವಾರ ಬೆಳಗ್ಗೆ 9ರಿಂದ ಸಂಜೆ 4ರ ವರೆಗೆ ನಡೆದ ಮತದಾನವು ಬೇರಾವುದೇ ಚುನಾವಣೆಗಳಿಗಿಂತಲೂ ಭಾರಿ ಪೈಪೋಟಿಯಿಂದ ಕೂಡಿತ್ತು. ಡಿಸಿಸಿ ಬ್ಯಾಂಕ್‌ ಕೇಂದ್ರ ಕಚೇರಿ ಆವರಣದಲ್ಲಿ ಸಾವಿರಾರು ಸಹಕಾರಿಗಳು ಜಮಾಯಿಸಿದ್ದರು. ಸಂಸದ ಬಿವೈ ರಾಘವೇಂದ್ರ ಅವರೂ ಮತದಾನದಲ್ಲಿ ಪಾಲ್ಗೊಂಡಿದ್ದರು. ಒಟ್ಟಾರೆ 621 ಮತಗಳಲ್ಲಿ 5 ಮತಗಳು ತಿರಸ್ಕೃತಗೊಂಡಿವೆ.

Related Post