Trending

11 ಎಕರೆ ಆಸ್ತಿ ಆಸೆಗೆ ಅಜ್ಜಿಯನ್ನೇ ಕೊಂದ ಅಣ್ಣನ ಮಕ್ಕಳು

Spread the love

ಬಾಗಲಕೋಟೆ: 11 ಎಕರೆ ಆಸ್ತಿಗಾಗಿ ಅಜ್ಜಿಯನ್ನೇ ಆಕೆಯ ಅಣ್ಣನ ಮಕ್ಕಳು ಕ್ರೂರವಾಗಿ ಕೊಲೆ ಮಾಡಿದ ಘಟನೆ ರಬಕವಿ–ಬನಹಟ್ಟಿ ತಾಲೂಕಿನ ಜಗದಾಳ ಗ್ರಾಮದಲ್ಲಿ ಬೆಳಕಿಗೆ ಬಂದಿದೆ.

ಮೃತರನ್ನು “ದಾನಜ್ಜಿ” ಎಂದೇ ಪ್ರಸಿದ್ಧಿಯಾಗಿದ್ದ ಚಂದ್ರವ್ವ ನೀಲಗಿ ಎಂದು ಗುರುತಿಸಲಾಗಿದೆ. ಸಮಾಜಸೇವೆಯಲ್ಲಿ ತೊಡಗಿಸಿಕೊಂಡು ದಾನಧರ್ಮದಿಂದಲೇ ಹೆಸರು ಗಳಿಸಿದ್ದ ದಾನಜ್ಜಿಯವರನ್ನು ಆಸ್ತಿ ವಿಚಾರದ ದ್ವೇಷದಿಂದ ಕುಟುಂಬದವರೇ ಹತ್ಯೆ ಮಾಡಿದ್ದಾರೆ ಎನ್ನಲಾಗುತ್ತಿದೆ.

ಚಂದ್ರವ್ವ ನೀಲಗಿ ಅವರು ಕಳೆದ 60 ವರ್ಷಗಳಿಂದ ತೇರದಾಳದ ಪ್ರಭುಲಿಂಗ ದೇವಸ್ಥಾನದ ಬಳಿ ತರಕಾರಿ ಮಾರಾಟ ಮಾಡಿಕೊಂಡು ಜೀವನ ನಡೆಸುತ್ತಿದ್ದರು. ತಮ್ಮ ಆದಾಯದ ಬಹುಭಾಗವನ್ನು ದಾನಧರ್ಮ ಕಾರ್ಯಗಳಿಗೆ ವಿನಿಯೋಗಿಸುತ್ತಿದ್ದರು. 2022ರಲ್ಲಿ ತೇರದಾಳದ ಪ್ರಭುಲಿಂಗ ದೇವಸ್ಥಾನಕ್ಕೆ ₹16 ಲಕ್ಷ ಮೌಲ್ಯದ ಬೆಳ್ಳಿ ಬಾಗಿಲನ್ನು ದಾನ ಮಾಡಿದ್ದು, ಅಲ್ಲದೆ ₹3 ಲಕ್ಷ ವೆಚ್ಚದಲ್ಲಿ ದೇವಸ್ಥಾನಕ್ಕೆ ಒಂದು ಕೊಠಡಿಯನ್ನೂ ನಿರ್ಮಿಸಿಕೊಟ್ಟಿದ್ದರು.

ಇಂತಹ ದಾನಶೀಲ ಹಾಗೂ ಧಾರ್ಮಿಕ ಮನೋಭಾವದ ಮಹಿಳೆಯನ್ನು ಆಕೆಯದೇ ಅಣ್ಣನ ಮಕ್ಕಳು 11 ಎಕರೆ ಜಮೀನಿನ ಆಸೆಗೆ ಭೀಕರವಾಗಿ ಕೊಲೆ ಮಾಡಿರುವುದು ಗ್ರಾಮಸ್ಥರಲ್ಲಿ ತೀವ್ರ ಆಘಾತ ಮೂಡಿಸಿದೆ. ಘಟನೆಯ ಮಾಹಿತಿ ತಿಳಿದ ಕೂಡಲೇ ಸ್ಥಳಕ್ಕೆ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದು, ಆರೋಪಿಗಳ ವಿರುದ್ಧ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಈ ಘಟನೆಯು ಆಸ್ತಿ ವಿವಾದಗಳು ಹೇಗೆ ಸಂಬಂಧಗಳನ್ನು ನಾಶ ಮಾಡುತ್ತವೆ ಎಂಬುದಕ್ಕೆ ಮತ್ತೊಂದು ದುರ್ಘಟನೆಯ ಉದಾಹರಣೆಯಾಗಿ ಪರಿಣಮಿಸಿದೆ.

[pj-news-ticker]