Trending

ಶಿವಮೊಗ್ಗ: ಆಪರೇಷನ್ ಸಿಂಧೂರ ಕಾರ್ಯಾಚರಣೆಯಲ್ಲಿ ಭಾಗವಹಿಸಿದ್ದ ಯೋಧನಿಗೆ ಅದ್ಧೂರಿ ಸ್ವಾಗತ

Spread the love

ಶಿವಮೊಗ್ಗ: ಉಗ್ರರರ ವಿರುದ್ಧದ ಆಪರೇಷನ್‌ ಸಿಂಧೂರ ಕಾರ್ಯಾಚರಣೆಯಲ್ಲಿ ಭಾಗವಹಿಸಿದ್ದ ಯೋಧ ವಿಜಯ್‌ ಕುಮಾರ್ ಅವರಿಗೆ ನಗರದ ರೈಲ್ವೆ ನಿಲ್ದಾಣದಲ್ಲಿ ಕುಟುಂಬಸ್ಥರು, ಸ್ನೇಹಿತರು ಮತ್ತು ಯುವ ಕಾಂಗ್ರೆಸ್‌ ಕಾರ್ಯಕರ್ತರು ಅದ್ಧೂರಿಯಾಗಿ ಸ್ವಾಗತ ಕೋರಿದರು. ಕಾಂಗ್ರೆಸ್ ಜಿಲ್ಲಾಧ್ಯಕ್ಷ ಪ್ರಸನ್ನ ಕುಮಾರ್, ಯುವ ಕಾಂಗ್ರೆಸ್ ಹಾಗೂ ಎನ್​ಎಸ್​ಯುಐ ಪದಾಧಿಕಾರಿಗಳು ಹವಾಲ್ದಾರ್ ವಿಜಯ ಕುಮಾರ್​​ಗೆ ಸಿಹಿ ತಿನ್ನಿಸಿ, ಹಾರ, ಪೇಟ, ಶಾಲು ಹೊದಿಸಿದರು.

ಶಿವಮೊಗ್ಗದ ಸಿಗೇಹಟ್ಟಿಯ ತುಮಕೂರು ಶ್ಯಾಮರಾವ್ ರಸ್ತೆಯ ನಿವಾಸಿಯಾದ ವಿಜಯ್​​ ಕುಮಾರ್​, ಕಥುವಾ ಸೆಕ್ಟರ್​ನಲ್ಲಿ​ ಭದ್ರತೆ ಹಾಗೂ ಪಾಕಿಸ್ತಾನದ ಡ್ರೋನ್​ಗಳ ಮೇಲೆ ಕಣ್ಗಾವಲು ಇಡಲು ನಿಯೋಜನೆಗೊಂಡಿದ್ದರು. ಸೇನೆಯ ಇಎಂಇ (ಎಲೆಕ್ಟ್ರಾನಿಕ್​ ಮೆಕ್ಯಾನಿಕಲ್​ ಇಂಜಿನಿಯರ್​) ಕಾರ್ಪ್ಸ್​ನಲ್ಲಿ ವಿಜಯ್ ಕುಮಾರ್ ಕರ್ತವ್ಯ ನಿರ್ವಹಿಸಿದ್ದರು. ವಿಜಯ್​ ಕುಮಾರ್ 2002ರ ಸೆಪ್ಟೆಂಬರ್​ 12 ರಂದು ಸೇನೆಗೆ ಸೇರಿದ್ದು, 23 ವರ್ಷ ಸೇವೆ ಸಲ್ಲಿಸಿದ್ದಾರೆ. ವಿಜಯ್​ ಕುಮಾರ್​ ಮುಂದಿನ ವರ್ಷದ ಸೆಪ್ಟೆಂಬರ್​​ನಲ್ಲಿ ಸೇವೆಯಿಂದ ನಿವೃತ್ತಿಯಾಗಲಿದ್ದಾರೆ. ಇವರಿಗೆ 6ಕ್ಕೂ ಹೆಚ್ಚು ಸರ್ವಿಸ್ ಮೆಡಲ್​ಗಳು ಸಿಕ್ಕಿವೆ.

ಹವಾಲ್ದಾರ್ ವಿಜಯ್ ಕುಮಾರ್ ಮಾತನಾಡಿ, ನಾನು ಈ ರೀತಿಯ ಸ್ವಾಗತ ಸಿಗುತ್ತದೆ ಎಂದು ನಿರೀಕ್ಷೆ ಮಾಡಿರಲಿಲ್ಲ. ನನ್ನ ಸ್ನೇಹಿತರು, ಕಾಂಗ್ರೆಸ್​ನ ಎಲ್ಲಾ ಪದಾಧಿಕಾರಿಗಳಿಗೆ ಧನ್ಯವಾದ. ಇಂತಹ ಸ್ವಾಗತದಿಂದ ನಾವು ಪಟ್ಟ ಕಷ್ಟ ಎಲ್ಲ ಮರೆತುಹೋಗುತ್ತೇವೆ. ಎಲ್ಲಾ ಯೋಧರಿಗೂ ಇದೇ ರೀತಿ ಸ್ವಾಗತ ಸಿಗಬೇಕು ಎಂದರು.

ನಾನು ಕಾಶ್ಮೀರದ ಕಥುವಾ ಸೆಕ್ಟರ್​​ನಲ್ಲಿ ಆಪರೇಷನ್ ಸಿಂಧೂರ ಕಾರ್ಯಾಚರಣೆಯಲ್ಲಿ ಭಾಗಿಯಾಗಿದ್ದಕ್ಕೆ ಹೆಮ್ಮೆ ಇದೆ. ಪಾಕ್ ನಿಂದ 25 ಕಿಲೋಮೀಟರ್​ ದೂರದಲ್ಲಿ ನನಗೆ ಡ್ಯೂಟಿ ಇತ್ತು. ಪಾಕ್​ನಿಂದ ರಾತ್ರಿ ವೇಳೆ ಬರುತ್ತಿದ್ದ ಡ್ರೋನ್​ಗಳನ್ನು ನಾವು ಹೊಡೆದುರುಳಿಸುತ್ತಿದ್ದೆವು, ಸೇನೆಯಲ್ಲಿ ಸೇವೆ ಸಲ್ಲಿಸಲು ಹಲವರಿಗೆ ಅವಕಾಶ ಸಿಗುತ್ತದೆ. ಆದರೆ ಯುದ್ಧದಲ್ಲಿ ಭಾಗಿಯಾಗುವ ಅವಕಾಶ ಕೆಲವರಿಗಷ್ಟೇ ಸಿಗುತ್ತದೆ. ಆಪರೇಷನ್ ಸಿಂಧೂರದಲ್ಲಿ ಭಾಗವಹಿಸಿದ್ದಕ್ಕೆ ನಮಗೆ ಹೆಮ್ಮೆ ಇದೆ ಎಂದು ಹೇಳಿದರು.

ವಿಜಯ್ ಕುಮಾರ್​ ಪತ್ನಿ ರೇಖಾ ಮಾತನಾಡಿ, ನಾವು ಅಲ್ಲಿನ ಕ್ವಾರ್ಟರ್ಸ್​ನಲ್ಲಿದ್ದಾಗ ಬಾಂಬ್ ಹಾಕಿದ ಶಬ್ಧ ಕೇಳಿಬರುತ್ತಿತ್ತು. ಇದರಿಂದ ನಮ್ಮನ್ನು ಬೇರೆಡೆಗೆ ಸ್ಥಳಾಂತರಿಸಿದರು. ಪಾಕ್​ ಡ್ರೋನ್​ ದಾಳಿ ವೇಳೆ ನಾವು ಎಲ್ಲಾ ಲೈಟ್ ಆಫ್ ಮಾಡಿ ಮನೆ ಒಳಗೆ ಇರಬೇಕಿತ್ತು. ನಮ್ಮನ್ನು ಅಲ್ಲಿಂದ ರೈಲಿನಲ್ಲಿ ಕಳುಹಿಸಿ ಕೊಟ್ಟರು. ರೈಲಿನಲ್ಲಿ ನಮಗೆ ಯಾವುದೇ ಟಿಕೆಟ್​​ ಇಲ್ಲದೆ ಕಳುಹಿಸಿಕೊಟ್ಟರು. ಪತಿ ದೇಶಕ್ಕಾಗಿ ಸೇವೆ ಸಲ್ಲಿಸುತ್ತಿದ್ದಾರೆಂಬ ಹೆಮ್ಮೆ ಇದ್ದರೂ ಸಹ ಭಯ ಇದ್ದೇ ಇರುತ್ತದೆ. ಈಗ ಅವರು ಸುರಕ್ಷಿತವಾಗಿ ವಾಪಸ್ ಬಂದಿದ್ದಕ್ಕೆ ಸಂತಸವಾಯಿತು ಎಂದರು.

ಸ್ಥಳೀಯರಾದ ಶಿವಕುಮಾರ್ ಮಾತನಾಡಿ, ಆಪರೇಷನ್ ಸಿಂಧೂರ ಕಾರ್ಯಾಚರಣೆಯಲ್ಲಿ ಶಿವಮೊಗ್ಗದ ವಿಜಯ್​ ಕುಮಾರ್ ಭಾಗಿಯಾಗಿದ್ದು, ನಮಗೆ ಸಂತೋಷ ತಂದಿದೆ. ವಿಜಯ್​ ಕುಮಾರ್​​ ಅವರಿಗೆ ನಾವೆಲ್ಲಾ ಅದ್ಧೂರಿಯಾಗಿ ಸ್ವಾಗತ ಕೋರಿದ್ದೇವೆ ಎಂದು ಹೇಳಿದರು.

[pj-news-ticker]