ಮಥುರಾ: ವೃಂದಾವನದಲ್ಲಿ ವಿಚಿತ್ರ ಘಟನೆಯೊಂದು ನಡೆದಿದ್ದು, ಬಂಕೆ ಬಿಹಾರಿ ದೇವಸ್ಥಾನದಲ್ಲಿ ಕೋತಿಯೊಂದು 20 ಲಕ್ಷ ರೂ. ಬೆಲೆಬಾಳುವ ವಜ್ರದ ಆಭರಣ ತುಂಬಿದ್ದ ಚೀಲವನ್ನು ಕದ್ದೊಯ್ದಿದೆ. ಘಟನೆ ಬೆಳಕಿಗೆ ಬರುತ್ತಿದ್ದಂತೆ ಪೊಲೀಸರು ಮತ್ತು ಸ್ಥಳೀಯರು ಸುಮಾರು ಎಂಟು ಗಂಟೆಗಳ ಕಾಲ ಕೋತಿಯನ್ನು ಬೆನ್ನಟ್ಟಿದ ಪ್ರಸಂಗ ನಡೆದಿದೆ.
ಅಲಿಗಢದ ಮೂಲದ ವಜ್ರ ವ್ಯಾಪಾರಿ ಅಭಿಷೇಕ್ ಅಗರ್ವಾಲ್ ಇತ್ತೀಚೆಗೆ ತಮ್ಮ ಕುಟುಂಬದೊಂದಿಗೆ ದೇವಸ್ಥಾನದಿಂದ ಹಿಂದಿರುಗುತ್ತಿದ್ದರು. ಆಗ ಕೋತಿಯೊಂದು ಇದ್ದಕ್ಕಿದ್ದಂತೆ ಬಂದು ಅವರ ಪತ್ನಿಯ ಪರ್ಸ್ ಅನ್ನು ಕಸಿದುಕೊಂಡಿತು. ಪರ್ಸ್ನಲ್ಲಿ ವಜ್ರದ ನೆಕ್ಲೇಸ್, ಎರಡು ವಜ್ರದ ಉಂಗುರಗಳು, ಮೂರು ಬೆಳ್ಳಿಯ ಕಾಲುಂಗುರ ಮತ್ತು ಎರಡು ವಜ್ರದ ಟಾಪ್ಸ್ ಇದ್ದವು. ಇವುಗಳ ಒಟ್ಟು ಮೌಲ್ಯ ಸುಮಾರು 20 ಲಕ್ಷ ರೂ.
ವಿಷಯ ತಿಳಿದ ಸ್ಥಳೀಯರು ಚೀಲವನ್ನು ಮರಳಿ ಪಡೆಯಲು ಪ್ರಯತ್ನಿಸಿದರು. ಆದರೆ ಸಾಧ್ಯವಾಗಲಿಲ್ಲ. ಕೋತಿ ಆಭರಣವಿದ್ದ ಚೀಲ ಕಸಿದು ಮರದ ಮೇಲೆ ಹಾರಿ ಮಾಯವಾಯಿತು. ನಂತರ ಕುಟುಂಬವು ಪೊಲೀಸರ ಸಹಾಯ ಕೋರಿತು. ಪೊಲೀಸರು ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿ ಕೋತಿಯ ಚಲನವಲನವನ್ನು ಪತ್ತೆಹಚ್ಚಲು ಪ್ರಯತ್ನಿಸಿದರು. ಅಂತಿಮವಾಗಿ ಪೊದೆಯಲ್ಲಿ ಕೋತಿ ಹೊತ್ತೊಯ್ದಿದ್ದ ಪರ್ಸ್ ಪತ್ತೆಯಾದವು.
‘ಉದ್ಯಮಿ ಅಭಿಷೇಕ್ ಅಗರ್ವಾಲ್ ಕುಟುಂಬದೊಂದಿಗೆ ಪ್ರಾರ್ಥನೆ ಸಲ್ಲಿಸಿ ಮನೆಗೆ ಮರಳಲು ನಿಲ್ಲಿಸಿದ್ದ ಕಾರಿನ ಕಡೆಗೆ ನಡೆದುಕೊಂಡು ಹೋಗುತ್ತಿದ್ದಾಗ ಈ ಘಟನೆ ನಡೆದಿದೆ. ಇದ್ದಕ್ಕಿದ್ದಂತೆ ಮೇಲೆರಗಿದ ಕೋತಿಯೊಂದು ಅವರ ಕೈಯಿಂದ 20 ಲಕ್ಷ ರೂ.ಗೂ ಹೆಚ್ಚು ಮೌಲ್ಯದ ವಜ್ರಾಭರಣಗಳನ್ನು ಹೊಂದಿದ್ದ ಕೈಚೀಲವನ್ನು ಕಸಿದುಕೊಂಡಿತು. ಸುಮಾರು ಎಂಟು ಗಂಟೆಗಳ ಪರಿಶೀಲನೆ ನಂತರ, ಪರ್ಸ್ ಪೊದೆಯಲ್ಲಿ ಬಿದ್ದಿರುವುದು ಕಂಡುಬಂದಿದೆ. ಅದರಲ್ಲಿದ್ದ ವಸ್ತುಗಳು ಸುರಕ್ಷಿತವಾಗಿದ್ದವುʼ ಎಂದು ಮಥುರಾ ಡಿಎಸ್ಪಿ ಸದರ್ ಸಂದೀಪ್ ಕುಮಾರ್ ಸಿಂಗ್ ತಿಳಿಸಿದ್ದಾರೆ.
ವೃಂದಾವನದಲ್ಲಿ ಕೋತಿಗಳ ಕಾಟ ಹೊಸದೇನಲ್ಲ. 2015ರಲ್ಲಿ, ಕೋತಿಯೊಂದು ಮುಂಬಯಿ ಮೂಲದ ಮಹಿಳೆಯ ಪರ್ಸ್ ಕಸಿದು, ಅದರಲ್ಲಿದ್ದ ಸುಮಾರು 1.5 ಲಕ್ಷ ರೂ. ಹಣವನ್ನು ಭಕ್ತರ ಮೇಲೆ ಎಸೆದಿತ್ತು. ಸದ್ಯ ಕೋತಿಗಳ ಕಾಟ ಹೆಚ್ಚಾಗಿದ್ದು, ವೃಂದಾವನಕ್ಕೆ ಆಗಮಿಸುವ ಭಕ್ತರಿಗೆ ಎಚ್ಚರಿಕೆಯಿಂದ ಇರಲು ಸೂಚಿಸಲಾಗಿದೆ. ಕೋತಿಗಳು ಯಾವಾಗ ಏನು ಮಾಡುತ್ತವೆಯೋ ಎಂದು ಹೇಳಲು ಸಾಧ್ಯವಿಲ್ಲ. ಹೀಗಾಗಿ ಬೆಲೆಬಾಳುವ ವಸ್ತುಗಳನ್ನು ಜೋಪಾನವಾಗಿ ಕಾಪಾಡಿಕೊಳ್ಳಿ ಎಂದು ಸೂಚನೆ ನೀಡಲಾಗುತ್ತಿದೆ.
