ಬೆಂಗಳೂರು: 2023ರ ವಿಧಾನಸಭೆ ಚುನಾವಣೆ ಮುನ್ನ ಶ್ರೀರಾಮುಲು ಅವರನ್ನು ಕಾಂಗ್ರೆಸ್ ಪಕ್ಷಕ್ಕೆ ಆಹ್ವಾನ ನೀಡಿದ್ದು ನಿಜ. ಆದರೆ ಆಗ ಬಿಜೆಪಿ ಬಿಡಲು ಒಪ್ಪದ ಶ್ರೀರಾಮುಲು, ಕಾಂಗ್ರೆಸ್ ಪಕ್ಷದ ಆಹ್ವಾನವನ್ನು ತಿರಸ್ಕರಿಸಿದ್ದರು ಎಂದು ಉಪಮುಖ್ಯಮಂತ್ರಿ ಡಿಕೆ ಶಿವಕುಮಾರ್ ಸ್ಪಷ್ಟಪಡಿಸಿದ್ದಾರೆ.
ವಿಧಾನಸೌಧದಲ್ಲಿ ಇಂದು ಮಾತನಾಡಿದ ಡಿಕೆ ಶಿವಕುಮಾರ್, 2023ರಲ್ಲಿ ಕೇವಲ ಶ್ರೀರಾಮುಲು ಮಾತ್ರವಲ್ಲ , ವಿವಿಧ ಪಕ್ಷಗಳ ಸುಮಾರು 50 ಮಂದಿಗೆ ಆಹ್ವಾನ ನೀಡಿದ್ದೆವು ಎಂದು ಹೇಳಿದರು. ಬೇರೊಂದು ಪಕ್ಷದ ನಾಯಕರನ್ನು ಆಹ್ವಾನಿಸಿವುದು ರಾಜಕಾರಣದಲ್ಲಿ ಇವೆಲ್ಲಾ ಸಹಜ ಎಂದೂ ಡಿಸಿಎಂ ನುಡಿದರು.
ಶ್ರೀರಾಮುಲು ಅವರನ್ನು ಕಾಂಗ್ರೆಸ್ ಪಕ್ಷಕ್ಕೆ ಕರೆತರುವ ಮೂಲಕ, ಸತೀಶ್ ಜಾರಕಿಹೊಳಿ ಅವರನ್ನು ನೇಪಥ್ಯಕ್ಕೆ ಸರಿಸುವ ಉದ್ದೇಶವನ್ನು ಡಿಕೆ ಶಿವಕುಮಾರ್ ಹೊಂದಿದ್ದಾರೆ ಎಂದು ಬಿಜೆಪಿ ಶಾಸಕ ಜನಾರ್ದನ ರೆಡ್ಡಿ ಆರೋಪ ಮಾಡಿದ್ದರು. ಇದಕ್ಕೆ ಸೂಕ್ತ ತಿರುಗೇಟು ನೀಡಿದ ಡಿಕೆಶಿ, ರಾಜಕಾರಣದಲ್ಲಿ ಒಬ್ಬರು ಮತ್ತೊಬ್ಬರನ್ನು ನೇಪಥ್ಯಕ್ಕೆ ಸರಿಸುವುದೆಲ್ಲಾ ಅಸಾಧ್ಯದ ಮಾತು ಎಂದು ಹೇಳಿದರು.
“ಜನಾರ್ಧನ ರೆಡ್ಡಿ ತಮ್ಮ ಬಾಯಿ ಚಪಲಕ್ಕೆ ಏನೇನೋ ಮಾತನಾಡುತ್ತಿದ್ದಾರೆ. ನನಗೆ ಅವರ ಹೆಸರು ಹೇಳಲೂ ಕೂಡ ಇಷ್ಟವಿಲ್ಲ. ನಾನೇಕೆ ಅವರ ಬಗ್ಗೆ ಮಾತನಾಡಲಿ? ವಿನಾಕಾರಣ ಅವರನ್ನು ದೊಡ್ಡವನನ್ನಾಗಿ ಮಾಡುವುದು ನನಗೆ ಇಷ್ಟವಿಲ್ಲ..” ಎಂದು ಡಿಕೆ ಶಿವಕುಮಾರ್ ಇದೇ ವೇಳೆ ಸೂಕ್ತ ತಿರುಗೇಟು ನೀಡಿದರು.
“ಜನಾರ್ಧನ ರೆಡ್ಡಿ ಈಗ ಬಂದು ಪಕ್ಷ ಒಡೆಯುವುದಕ್ಕೆ ನೋಡುತ್ತಿದ್ದಾನೆ. ಆದರೆ ಇವೆಲ್ಲಾ ಆಗು ಹೋಗದ ಮಾತುಗಳು. ಪಕ್ಷದಲ್ಲಿ ಎಲ್ಲರೂ ಸರಿಯಿದ್ದು, ಹೊರಗಿನವರ ಅಸಂಬದ್ಧ ಹೇಳಿಕೆಗಳಿಂದ ನಾವು ಚಿಲಿತರಾಗುವುದಿಲ್ಲ..” ಎಂದು ಉಪಮುಖ್ಯಮಂತ್ರಿಗಳು ಸ್ಪಷ್ಟಪಡಿಸಿದರು.
“ನಾನು ಇತ್ತೀಚಿಗೆ ಶ್ರೀರಾಮುಲು ಅವರೊಂದಿಗೆ ಮಾತನಾಡಿಲ್ಲ. ಹಿಂದೆ 2023ರಲ್ಲಿ ಕಾಂಗ್ರೆಸ್ ಪಕ್ಷ ಸೇರುವಂತೆ ಅವರಿಗೆ ಆಹ್ವಾನ ನೀಡಿದ್ದೆ. ಆದರೆ ಅವರು ಬಿಜೆಪಿಯಲ್ಲೇ ಮುಂದುವರೆಯುವುದಾಗಿ ಹೇಳಿದ ಮೇಲೆ ಮತ್ತೆ ಮಾತನಾಡಲು ಹೋಗಲಿಲ್ಲ..” ಎಂದು ಡಿಕೆ ಶಿವಕುಮಾರ್ ಸ್ಪಷ್ಟಪಡಿಸಿದರು.
