Breaking
Tue. Jul 16th, 2024

ಅಫ್ಘಾನಿಸ್ತಾನ ಕ್ರಿಕೆಟ್ ತಂಡದ ಹಣೆಬರಹ ಬದಲಿಸಿದ ಕೋಚ್ ಅಜಯ್ ಜಡೇಜಾ ಒಂದು ನಯಾ ಪೈಸೆ ಪಡೆದಿಲ್ಲ!

By Mooka Nayaka News Jun 15, 2024
Spread the love

ನವದೆಹಲಿ: ತೊಂಭತ್ತರ ದಶಕದ ಆಲ್ರೌಂಡರ್ ಕ್ರಿಕೆಟ್ ತಾರೆ ಅಜಯ್ ಜಡೇಜಾ ಏನು ಮಾಡುತ್ತಾ ಇದ್ದಾರೆ ಎಂಬುದು ಅನೇಕರಿಗೆ ಗೊತ್ತೇ ಇರಲಿಲ್ಲ. ಇತ್ತೀಚಿನ ವರ್ಷಗಳಲ್ಲಿ ಅವರು ಅಫ್ಘಾನಿಸ್ತಾನ ಕ್ರಿಕೆಟ್ ತಂಡಕ್ಕೆ ತರಬೇತಿ ನೀಡುತ್ತಿದ್ದಾರೆ. ಆದರೆ, ಅದಕ್ಕಾಗಿ ಅವರು ಪಡೆದ ಸಂಭಾವನೆಯೆಷ್ಟು ಗೊತ್ತೇ? ಏನೂ ಇಲ್ಲ… ಹೌದು. ಅಕ್ಷರಶಃ ಏನೂ ಇಲ್ಲ.

ಅಸಲಿಗೆ, ಅವರ ಕೋಚಿಂಗ್ ನಿಂದಲೇ ಅಫ್ಘಾನಿಸ್ತಾನ ಕ್ರಿಕೆಟ್ ತಂಡ, ಕಳೆದ ವರ್ಷ ನಡೆದಿದ್ದ ಕ್ರಿಕೆಟ್ ವಿಶ್ವಕಪ್ ನಲ್ಲಿ ಆಡುವ ಅರ್ಹತೆಯನ್ನು ಗಳಿಸಿಕೊಂಡದ್ದು. ಯಾವುದೇ ತಂಡ ನಿರ್ದಿಷ್ಟ ಕ್ರಿಕೆಟ್ ಋುತುವನಲ್ಲಿ ಆಡುವ ಕ್ರಿಕೆಟ್ ಸರಣಿಗಳಲ್ಲಿ ಎಷ್ಟು ಗೆಲ್ಲುತ್ತದೆ ಎಂಬುದರ ಮೇಲೆ ಆ ತಂಡವು ವಿಶ್ವಕಪ್ ಕ್ರಿಕೆಟ್ ಪಂದ್ಯಾವಳಿಗೆ ಅರ್ಹತೆ ಗಳಿಸುವ ನಿಯಮ ಇತ್ತೀಚೆಗೆ ಚಾಲ್ತಿಗೆ ಬಂದಿದೆ. ಆ ತಂಡವು ವಿಶ್ವಕಪ್ ಗೆ ಅರ್ಹತೆ ಪಡೆಯಲು ಮಾತ್ರವಲ್ಲ ವಿಶ್ವಕಪ್ ಕ್ರಿಕೆಟ್ ಟೂರ್ನಿಯಲ್ಲಿ ದೈತ್ಯ ತಂಡಗಳಾದ ಇಂಗ್ಲೆಂಡ್ ಹಾಗೂ ಪಾಕಿಸ್ತಾನ ತಂಡಗಳನ್ನು ಸೋಲಿಸಿತ್ತು ಅಫ್ಘಾನಿಸ್ತಾನ.

ಮತ್ತೊಂದೆಡೆ, 2023ರ ವಿಶ್ವಕಪ್ ಟೂರ್ನಿಯನ್ನು ಗೆದ್ದ ಚಾಂಪಿಯನ್ ತಂಡವಾದ ಆಸ್ಟ್ರೇಲಿಯಾ ವಿರುದ್ಧ ಕೂದಲೆಳೆಯ ಅಂತರದಲ್ಲಿ ಸೋತಿದ್ದರೂ, ಆ ತಂಡಕ್ಕೆ ನೀರಿಳಿಸಿತ್ತು ಅಪ್ಘಾನಿಸ್ತಾನ. ಕ್ರಿಕೆಟ್ ನಲ್ಲಿ ಅಂಬೆಗಾಲಿಡುತ್ತಿರುವ ಅಫ್ಘಾನಿಸ್ತಾನದ ಈ ಪರಿಯ ಪ್ರದರ್ಶನ ಕಂಡು ನಿಬ್ಬೆರಗಾದ ಹಲವಾರು ಮಂದಿ, ಆ ತಂಡದ ಉತ್ತಮ ಪ್ರದರ್ಶನದ ಅಷ್ಟೂ ಕ್ರೆಡಿಟ್ಟನ್ನು ಅಜಯ್ ಜಡೇಜಾ ಅವರಿಗೆ ಸಮರ್ಪಿಸಿದ್ದರು.

ಅಫ್ಘಾನಿಸ್ತಾನ ಕ್ರಿಕೆಟ್ ತಂಡದ ಅಸಿಸ್ಟಂಟ್ ಕೋಚ್ ಹಾಗೂ ಪೋಷಕರಾಗಿ ಸೇವೆ ಆರಂಭಿಸಿದ ನಂತರವೇ ಆ ತಂಡದ ಪ್ರದರ್ಶನದಲ್ಲಿ ಭಾರೀ ಬದಲಾವಣೆ ಕಾಣಲು ಸಾಧ್ಯವಾಯಿತು ಎಂಬ ವಿಶ್ಲೇಷಣೆಗಳು ಮೂಡಿಬಂದವು. ಅಫ್ಘಾನಿಸ್ತಾನ ತಂಡದ ಹೊಣೆಗಾರಿಕೆ ಹೊತ್ತಿರುವ ಅಫ್ಘಾನಿಸ್ತಾನ ಕ್ರಿಕೆಟ್ ಸಂಸ್ಥೆ ಕೂಡ ತಾವು ಜಡೇಜಾ ಅವರಿಗೆ ಆಭಾರಿಯಾಗಿರುವುದಾಗಿ ಬಹಿರಂಗವಾಗಿ ಹೇಳಿತ್ತು.

ಇಷ್ಟೆಲ್ಲಾ ಹೆಗ್ಗಳಿಕೆಗಳನ್ನು ಪಡೆದ ಅಜಯ್ ಜಡೇಜಾ, ತಮ್ಮ ಈ ಗಣನೀಯ ಸೇವೆಗೆ ನಯಾ ಪೈಸೆಯನ್ನೂ ಪಡೆದಿಲ್ಲವಂತೆ. ಅದರೂ ಅಫ್ಘಾನಿಸ್ತಾನ ಕ್ರಿಕೆಟ್ ತಂಡದ ನಿರ್ದೇಶಕರು ಬಲವಂತವಾಗಿ ಹಣ ಕೊಡಲು ಮುಂದಾದಾಗ, ನೀವು ಹಣ ಕೊಟ್ಟರೆ ನಾನು ಕೋಚಿಂಗ್ ಕೊಡುವುದನ್ನೇ ನಿಲ್ಲಿಸುತ್ತೇನೆ ಎಂದು ನಯವಾದ ಧಮುಕಿ ಹಾಕಿದ್ದರಂತೆ ಜಡೇಜಾ.

ಈ ವಿಚಾರವನ್ನು ಅಫ್ಘಾನಿಸ್ತಾನದ ಕ್ರಿಕೆಟ್ ಸಂಸ್ಥೆಯ ಕಾರ್ಯಾನಿರ್ವಾಹಕ ನಿರ್ದೇಶಕರಾದ ನಸೀಬ್ ಖಾನ್ ಅವರೇ ಬಹಿರಂಗಪಡಿಸಿದ್ದಾರೆ. ಒಂದೆರಡು ಬಾರಿಯಲ್ಲ, ಹಲವಾರು ಬಾರಿ ನಾವು ಸಂಭಾವನೆಯನ್ನು ತೆಗೆದುಕೊಳ್ಳುವಂತೆ ಅಜಯ್ ಜಡೇಜಾ ಅವರನ್ನು ನಾವು ಕೇಳಿಕೊಂಡಿದ್ದೆವು. ಆದರೆ, ಅವರು ಅದಕ್ಕೆ ಒಪ್ಪಲಿಲ್ಲ. ಸಂಭಾವನೆಯಲ್ಲಿ ನೀವು ನನ್ನನ್ನು ಅಳೆಯುವುದಾದರೆ ನಾನು ಕೋಚಿಂಗ್ ಕೊಡುವುದನ್ನೇ ನಿಲ್ಲಿಸುತ್ತೇನೆ ಎಂದು ಹೇಳಿದ್ದರು. ಅವರ ನಿಸ್ವಾರ್ಥ ಸೇವೆಗಾಗಿ ನಾವೆಲ್ಲರೂ ಚಿರಋಣಿಯಾಗಿದ್ದೇವೆ ಎಂದು ಹೇಳಿದ್ದಾರೆ.

Related Post